Zimsenbabwe Express

Stjórnarskrárbreyting væntanleg í Zimsenbabwe

Mannréttindanefnd Hins upplýsta alræðisríkis Zimsenbabwe hefur lagt til við upplýstan alráðinn að jákvætt kynfrelsi verði gert að stjórnarskrárbundnum mannréttindum. Það er einróma álit nefndarinnar að neikvætt kynfrelsi sem færir fólki útilokandi einkarétt yfir kynfærum sínum, þ.e. líkamanum öllum ekki einvörðungu æxlunarfærum hans, þar sem öðrum eru heimiluð afnot einvörðungu með réttindaafsali rétthafa með einhliða yfirlýsingu eða gagnkvæmum samningum, sé ekki í samræmi við opið samfélag sem byggir á almennum manngildissjónarmiðum. Hið neikvæða kynfrelsi, þótt gagnkvæmur réttur sé og almennur, leiði til mikils kynferðislegs ójöfnuðar meðal þegnanna. Þeim raunverulegu efnislegu réttindum sem ætlað sé að verja með hinu neikvæða kynfrels sé svo miskipt meðal þegnanna. Lögin séu því einungis formlega í samræmi við jafnræðisákvæði stjórnarskráarinnar og janréttishugsjónina en ekki hvað raunverulegt efnislegt inntak varðar. Hér er því ekki einvörðungu um siðferðilegt álitamál að ræða heldur krefst stjórnskipuleg nauðsyn þess að brugðist sé við með afgerandi og fumlausum hætti.

Það er staðföst sannfæring og trú nefndarinnar að réttur hvers einstaklings til kynlífis sé heilagur og algildur og skuli viðurkenndur sem slíkur af alríkinu. Enginn einstaklingur geti svipt annan þessum rétti. Þetta er hið jákvæða kynfrelsi. Því miður er staðreyndin sú að í gegnum söguna hefir réttur þessu verið fótum troðinn. Hópur einstaklinga hefur verið sviptur þessum rétti sökum aðskiljanlegra ágalla sem eru við nánari eftirgrennslan gerviástæður. Vandamálið er ekki að sumt fólk sé ljótt, leiðinlegt, óaðlaðandi eða illa til ástaratlota fallið, heldur að það þyki ljótt, leiðinlegt, óaðlaðandi eða illa til ástaratlota fallið. Þetta fólk er fórnarlömb fagurfræðilegrar menningarskilyrðingar og félagsmótunar hefðarinnar sem endurspeglað hefir duttlungafulla mannkostafordóma menningarinnar í gegnum aldir alda. Þessi viðhorf eru ekki algild, þeim má breyta. Þeim ber að breyta. Hver og einn einstaklingur er fallegur og skemmtilegur. Jafnfallegur og skemmtilegur og sá næsti, bara með öðrum hætti, fjölbreytilegum hætti.

Verst er þó að mannkostarökin, ef þau væru nú til staðar, sem þau eru vitanlega ekki, eru engin rök fyrir synjun uppfyllingar kynfrelsis. Þetta eru fordómarök sem standast ekki hina vísindalegu aðferð. Að neita einhverjum um kynferðislegt samneyti a priori er óupplýst aðferð. Einstaklingur er fyrirfram ekki í neinni aðstæðu til að meta gæði eða nytjar af kynlífi með öðrum einstaklingi. Þær verða einungis metnar eftir að verknaði er lokið. En þar ber allt að sama brunni. Allt kynlíf er jafngott, mismunandi gott en jafngott engu að síður. Engin efnisleg rök eru fyrir hendi sem réttlæta hið neikvæða kynfrelsi.

Mikils er um vert að benda á að enginn verður sviptur rekkjunautum, menn munu fá fleiri. Iðkun hvílubragða mun aukast meðal þegna Hins upplýsta alræðisríkis Zimsenbabwe. Hvílubrögð án áhyggja um dóma fyrir né eftir. Enginn fórnarkostnaður vegna tíma sem fer í að leita sér að rekkjunauti, né ósamhverfar upplýsingar sem geta leiða af sér kynferðislega óskilvirkni. Ekkert hrakval eða freistnivandi, því ekki er hægt að velja neitt hrak. Með því að stjórnarskrárbinda jákvætt kynfrelsi verður því velsæld almennings hámörkuð.

Enn fremur er þess beint til alráðsins að þeir aðilar sem hafa sætt harðræði af hálfu alríkisins er það hefur í góðri trú en rangri reynt að verja hið neikvæða kynfrelsi eigi skaðabótarétt á hendur alríkinu og einnig að alríkið hjálpi til við fullnustu hins jákvæða kynfrelsis þeirra.

Masókistar felldu 14 lögreglumenn í Zimsenbabwe

Í það minnsta 14 lögreglumenn féllu þegar bifreið sem þeir voru í fór yfir jarðsprengju nærri bænum Dogan í Austur-Zimsenbabwe. Talið er að masóikstar hafi komið henni fyrir. 11 voru fluttir á sjúkrahús. Lögreglulið var í kjölfarið sent á svæðið og er leit hafin að tilræðismönnunum.

Fleiri en 6.000 hafa fallið í 20 ára langri uppreisn masókista í Zimsenbabwe, en þeir vilja stofna fríríkið Masólía. Interfax fréttastofan segir fjóra masókista hafa verið fellda fyrr í dag á svipuðum slóðum og nokkra hafa særst í skotbardaga við lögreglu.

Ekki náðist í Emmanúel Qualraidi leiðtoga masókista (sjá mynd) þar sem hann þurfti að fara í kalda sturtu.